Ek glo daar is bitter min mense in ons land wat nie nou al goed keelvol is vir Corona en Covid nie. Ek is verseker keelvol daarvoor en ek voel die inperking moet nou end kry.

As kind van die Here is ek egter verplig om vir jou - ook 'n kind van die Here - moed in te praat, 'n toepaslike Bybelversie te kwoteer en weer daarop te wys dat alles ten goede sal meewerk vir hulle wat Hom liefhet en volgens Sy besluit geroep is.

En ek doen dit. Maar ...

As jy soos ék voel, wil ek net vir jou sê dat dit nóú die regte tyd is om te bly kies om die regte ding te doen. Ons mag nie oordeel nie. Ons moet bid vir ons vyande en vir mekaar. Ons moet in liefde optree teenoor alle mense. Ons moet vergewe - al dink ons die reëls en wette wat die regering maak is onoordeelkundig en dalk selfs selfsugtig. Ons moet gehoorsaam wees aan die reëls wat oor ons gestel is. Ons moet bly doen wat reg is.

Dit beteken prakties dat ons nie nou dat drank weer beskikbaar is, moet begin om skelm bymekaar te kuier nie. Of ophou om ons maskers te dra nie. Of ophou om higiëne en sosiale afstand te handhaaf nie. (Al voel dit vir ons hóé sinneloos.)

Ons is immers die enigste verteenwoordigers wat God op aarde het. As óns nie die goeie voorbeeld stel nie, gaan niemand anders dit doen nie. Iemand het eenmaal gesê : IT IS NEVER WRONG TO ALWAYS DO THE RIGHT THING